Ýaponiýanyň tiz bişýän tagam öndürmekde ýöriteleşen Nissin kompaniýasy kofeinli tiz bişýän aş çykardy. Bu barada CNN ýazýar.
Öndüriji täze tagamyň kompýuteriň başynda köp oturyp, wagtly-wagtynda naharlanmagy unudýan oýunçylar üçin amatlydygyna ynanýar. Tagam ulanyjylara çalt garbanmaga we şol bir wagtyň özünde olaryň göwnüni götermäge kömek etmeli.
“Ýaponiýanyň ilatynyň arasynda oýunçylaryň sany ýylsaýyn köpelýär, esasanam ýaşlaryň arasynda bu meşhurlyga eýe bolýar. Käbir maglumatlara görä, olaryň sany 50 milliondan geçipdir" - diýip, brendiň wekilleri tagamyň wajyplygyny delillendirýärler.
Energiýaly aşyň iki hili tagamy hödürlener: sarymsakly we gara burçly. Şeýle-de, oňa goşundylaryň arasynda krewetka, doňuz eti, ýumurtga we kelem hem bolar. Adaty bolmadyk täze tagam 18-nji sentýabrda Ýaponiýada satuwa çykarylar. Bahasy 280 iýen bolar.
