“Formula-1-iň” “Mersedes” topary sürüjileriň ikisi, britaniýaly Lýuis Hemilton we Jorj Rassel bilen şertnamalaryň uzaldylandygyny mälim etdi. Täze şertnamalar 2025-nji ýylyň ahyryna çenli niýetlenýär. Bu barada championat.com habar berýär.
Ýedi gezek dünýä çempiony Lýuis Hemiltonyň iki ýyllyk şertnamasy 100 mln funt sterling bilen bahalandyrylýar, bu 116 mln ýewro deňdir. Şeýlelik bilen, britaniýaly sürüji ýylda 58 mln ýewro alar diýip, “Mirror” belleýär. Şeýle maglumatlary “The Telegraph” we “Daily Mail” hem berýär.
Eger öňki şertnama bilen deňeşdirseň, sürüjiniň ýyllyk tölegi, takmynan, 16 mln ýewro ýokarlandy. Geçen möwsüm Hemiltonyň zähmet haky rekord derejededi, ýöne “Red Bulluň” sürüjisi Maks Werstappeniň geçen möwsümde üstünlikli çykyşlary üçin bonuslaryň netijesinde has köp gazanmagy başarandygy habar berilýär.
Lýuis Hemilton “Mersedese” 2013-möwsüminiň öňüsyrasynda goşuldy. Topar bilen bilelikde alty gezek dünýä çempiony boldy we Konstruktorlaryň kubogynyň sekiz ýaryşynda ýeňşe ýardam berdi.
