30-njy awgustda Bişkekde «Barselonanyň» we Aziýanyň ady taryha öwrülen futbol ýyldyzlarynyň ýoldaşlyk duşuşygy geçirildi.
«Aziýanyň ýyldyzlarynyň» toparynda ilkinji minutlardan meýdança çykanlar: Gyrgyzystanyň Prezidenti Sadyr Žaparow, gazak weteranlary Dawid Loriýa, Samat Smakow, Andreý Karpowiç, Igor Awdeýew, gyrgyzystanly ýyldyzlar Ruslan Sydykow, özbeklerden Serwer Jeparow, Bahtiýor Aşurmatow, Leonid Koşelew, eýranly Hodadad Azizi we BAE-den Başir Said.
«Barselonanyň» başlangyç düzümi: Angoý Hesus, Juliano Belletti, Edgar Dawids, Karles Puýol, Roberto Trasorras, Hawýer Sawiola, Lýudowik Žýuli, Jowani DOs Santos, Riwaldo, Serhi Barhuan we Huan Pablo Sorin.
Oýun başlamazdan ozal, Gyrgyzystanyň Prezidenti gutlag bilen çykyş etdi. Çykyşynda ol Jalal-Abadda «Barselonanyň» Merkezi Aziýada ilkinji akademiýasynyň açylmagy bilen gutlady.
Şeýle hem gyrgyz Lideri Bişkekde hem bu futbol klubunyň gurluşygynyň düýbüniň tutulandygyny habar berdi.
Futbol duşuşygy Dolon Omurzakow adyndaky stadionda geçirildi. Stadiona müňlerçe futbol janköýerleri ýygnandy. Oýnuň netijeleri boýunça «Barselona» 3:0 hasap bilen ýeňiş gazandy. Gollary Jowani Dos Santos, Huan Pablo Sorin we Hawýer Sawiola geçirdi.
Duşuşyga ýerli eminler eminlik etdi.
