“Barselonanyň” wingeri Lamin Ýamal 10-njy belginiň täze eýesi boldy. Bu barada ol sosial ulgamlarda habar berip, suratlary bilen paýlaşdy.
“Meniň belgim. Meniň taryhym. Meniň syýahatym. x10” – diýip, futbolçy ýazdy.
Şeýle-de, ol öz profilindäki esasy suratyny üýtgetdi: ol ýerde indi futbolçynyň egninde alawlap duran 10-luk belgili arkasynyň suraty dur.
Belläp geçsek, 13-nji iýulda futbolçy 18 ýaşyny doldurdy. Şondan soň Ýamal “Barselona” bilen şertnamasyny 2031-nji ýylyň tomsuna çenli uzaltdy.
Taraplar täze şertnama gol çekmek barada, aslynda, maý aýynyň ahyrynda ylalaşdy, ýöne şol wagt mesele oýunçynyň kämillik ýaşyna çenli yza süýşürildi, üstesine-de Ýamal dabarada öz enesini görmek isledi. Indi klub gol çekilendigi barada resmi taýdan yglan etdi.
“Barselonanyň” ýolbaşçylygy Ýamaly diňe bir ýaş zehin däl, eýsem strategik taýdan möhüm oýunçy hasaplaýandygyny aýdyň görkezdi. Onuň şertnamasynda möhletinden ir satyn almak üçin ägirt mukdar – 1 mlrd ýewro görkezilýär.
“Barselonada” soňky gezek 10-njy belgini göteren oýunçy Ansu Fati bolupdy. Ýakynda klub ony “Monako” kärendesine berdi. Ondan öň, 2008-nji ýyldan 2021-nji ýyla çenli bu belgi Lionel Messä degişli boldy. Ýamalyň özi geçen möwsüm 19-njy belgide oýnady. Bu belgini argentinaly oýunçy hem alypdy.
Geçen möwsümde Ýamal “Barselona” bilen Ispaniýanyň çempionatyny, Kubogyny we Superkubogyny utdy. Onuň hasabynda ähli ýaryşlarda 55 oýun, 18 gol we 25 assist bar.
2024-nji ýylyň noýabrynda Ýamal Ýewropanyň iň gowy ýaş futbolçysy hökmünde Golden Boy baýragyny aldy. Ispaniýanyň milli ýygyndysynyň düzüminde Ýewropa çempionaty – 2024-i utdy. Şeýle-de, ol Transfermarkt portaly boýunça, dünýäniň iň gymmat futbolçysydyr (200 mln ýewro).
