“Barselona” 2025/26 möwsümi üçin myhmançylykda geýjek täze eşik toplumyny hödürledi. Köýnekçe gara we benewşe öwüşgin bilen sary reňkde ýerine ýetirildi – ol Kobi Braýantyň çykyş eden “Los-Anjeles Leýkers” basketbol toparynyň reňklerine salgylanýar.
Adaty Nike logotipiniň deregine eşik toplumynda Kobe Sheath nyşany – NBA-nyň meşhur oýunçysynyň brendini alamatlandyrýan gyna salnan gylyç ýerleşdirildi.
Klubuň beýanynda bellenilişi ýaly, bu eşik toplumy Braýant bilen “Barselonany” baglanyşdyrýan sport kämilligine umumy ymtylyşy görkezýär.
Kobe Bryant brendi bilen hyzmatdaşlyk üç ýyl – 2027/28 möwsümine çenli dowam eder. Klub bu taslamanyň diňe bir Braýantyň maksada okgunlylygyny görkezmän, eýsem onuň futbola bolan söýgüsini we “Barselonanyň” oýun stiline hem pelsepesine gyzyklanmasyny ýatladýandygyny belledi.
Kobi bu toparyň muşdagydy, ol Barselona gelen wagty we toparyň ABŞ-a saparynyň çäklerinde oýunçylar bilen duşuşýardy.
Ýatlap geçsek, basketbolçy 2020-nji ýylyň 26-njy ýanwarynda Kaliforniýanyň Kalabasas şäherinde hususy dikuçarynyň heläkçilige uçramagy netijesinde heläk boldy. Ol 41 ýaşyndady. Bortdaky 9 adamyň ählisi – uçarman we 8 ýolagçy, şol sanda Kobi Braýantyň 13 ýaşly gyzy Jianna heläkçiligiň pidasy boldy.
