Jalal-Abadda ýurtdaky iň iri futbol infrastrukturasynyň – «Barselona» futbol klubynyň Merkezi Aziýadaky ilkinji futbol akademiýasynyň açylyş dabarasy boldy. Dabara Gyrgyzystanyň Prezidenti Sadyr Žaparow, «Barselona» FK-nyň prezidenti Žoan Laporta, şeýle hem Ronaldinýo, Karles Puýol we Erik Abidal ýaly ispan klubynyň birnäçe meşhur öňki oýunçylary gatnaşdylar.
«Barselona» FK-nyň akademiýasy – Gyrgyz futbol bileleşigi bilen ispan klubynyň arasyndaky hyzmatdaşlygyň çäginde durmuşa geçirilýän taslamadyr. Taslamanyň maksady – Gyrgyzystanyň futbol mümkinçiligini ösdürmek, ýaş zehinleri «Barselona» FK-nyň usullary boýunça taýýarlamak we sebitde futbol medeniýetiniň ýaýramagyna itergi bermek.
Akademiýa 5,2 gektar meýdany eýeleýär, bu ýerde tebigy ot örtügi bolan iki sany doly göwrümli futbol meýdançasy, howany goldaýan gümmeziň aşagyndaky doly göwrümli emeli örtügi bolan meýdança we iki kiçi meýdança ýerleşýär.
Mundan başga-da, akademiýanyň çäginde mekdep binasy, sport zaly we dört gatly dolandyryş binasy bar. Akademiýada seçip alyş synaglarynyň netijelerine görä saýlanjak 6 – 18 ýaş aralygyndaky çagalar tälim alarlar.
Açylyş dabarasyndan soň, «Barselona» FK-nyň meşhur öňki oýunçylary bilen Gyrgyzystanyň günorta sebitlerinden dürli futbol toparlarynyň çagalarynyň arasynda dostlukly oýun geçirildi.
