Nigeriýanyň milli ýygyndysynyň hüjümçisi Wiktor Osimhen Italiýanyň “Napoli” klubundan “Galatasaraý” türk klubuna geçdi. Bu barada Stambulyň futbol klubunyň resmi saýtynda habar berilýär.
26 ýaşly hüjümçi bilen şertnama dört ýyl möhlet bilen baglaşyldy. Oýunçy täze klubda ýylda 15 mln ýewro gazanar, şeýle-de bonus hökmünde 1 mln ýewro göz öňünde tutuldy. Osimhen imij hukuklary üçin hem ýene 5 mln ýewro alar.
Transfer mukdary 75 mln ýewro bolup, türk klubunyň taryhynda iň uly şertnama öwrüldi. “Napoli” hem oýunçynyň indiki satuwyndan 10% alar.
Geçen möwsümde Osimhen “Galatasaraýda” kärendesine oýnady we dürli ýaryşlarda 41 oýunda 37 gol geçirdi. Ol 26 gol bilen Türkiýäniň Superligasynda iň gowy bombardir bolup, kluba Türkiýäniň çempionatyny we Kubogyny utmaga kömek etdi.
Osimhen 2020-nji ýyldan bäri “Napoliniň” futbolçysy bolup, topar bilen Italiýanyň çempionatyny (2022/23) utdy, şol möwsüm ol Seriýa A-da iň gowy bombardir boldy. Klub üçin jemi 133 oýunda 76 gol geçirdi. “Napoliden” öň Osimhen Germaniýanyň “Wolfsburg”, Belgiýanyň “Şarlerua” we Fransiýanyň “Lill” toparlarynda çykyş etdi. Ol Nigeriýanyň milli ýygyndysynyň taryhynda 26 gol bilen iň gowy bombardirdir.
