2023-nji ýylyň ýedi aýynda Türkmenistan bilen Özbegistanyň özara haryt dolanyşygynyň möçberi 492 million dollara barabar boldy. Bu geçen ýylyň degişli döwri bilen deňeşdirilende 1,4% artykdyr diýip, Özbegistanyň Prezidentiniň ýanyndaky Statistika boýunça agentligi habar berdi.
Türkmenistan Özbegistana 383 mln dollarlyk haryt eksport etdi, 109 mln dollarlyk harydy bolsa import etdi. Bu görkeziji babatda Türkmenistan Özbegistanyň esasy söwda hyzmatdaşlarynyň ilkinji onlugyna girýär.
Özbegistana eksport edilen esasy harytlaryň hatarynda elektrik energiýasy we tebigy gaz bar. Türkmen elektrik energiýasyny, şol sanda, tebigy gazyny ibermek barada gazanylan ylalaşyklar netijesinde soňky ýyllarda haryt dolanyşygynyň möçberi bäş esse ösdi.
Özbegistan türkmen bazaryna himiýa senagatynyň, oba hojalygynyň önümlerini we senagat enjamlaryny getirýär.
