Awstraliýaly alymlar Ýaşyl yklymyň tropiki sebitlerinde amala aşyran gözleglerinde möýleriň birbada 40-a golaý täze görnüşini açdylar. Bognaýaklylar maşgalasynyň bu wekilleri çylşyrymly howa şertlerinde diri galmak üçin ýerde hin gazyp, şolarda ýaşaýarlar.
Günbatar Awstraliýa ştatynyň uniwersitetiniň we Kwinslend muzeýiniň hünärmenleriniň bellemeklerine görä, tapylan täze görnüşler latyn Y harpy şekilinde hin gazýan möýleriň görnüşlerine degişlidirler. Olaryň hininde esasy girelgeden başga, howp abanan pursatlarda duýdansyz gaçmak üçin gizlin geçelge hem bar. Alymlar alty aýyň dowamynda şeýle hinleriň 140 sanysyny tapdylar.
«Biz awstraliýa hin gazyjy möýleriniň täze görnüşleri barada ilkinji makalany taýýarlaýarys. Molekulýar barlag usuly arkaly biz bu bognaýaklylaryň ewolýusiýasyny we ýaýraýyş taryhyny öwrenmegi göz öňünde tutýarys» diýip, barlaga gatnaşan alym belläp geçdi.
