MLS + MX Ligalaryň kubogynyň “Neşwill” bilen “Inter Maýaminiň” arasynda geçirilen final oýny tamamlandy. Toparlar Neşwilldäki (ABŞ) “Geodis Park” stadionynda oýnadylar. Oýnuň esasy wagty deňme-deň – 1:1 hasabynda tamamlandy. Oýundan soňky penalti tapgyrynda “Inter Maýaminiň” oýunçylary has güýçli boldy. Şu günki oýunda gazanylan ýeňiş “Inter Maýamä” MLS + MX Ligalaryň kubogyny getirdi. Bu Lionel Messiniň täze klubda ilkinji baýragydyr.
Şeýlelik bilen, argentinaly professional karýerasynda 44-nji kubogyny gazanyp, taryhda iň köp titula eýe bolan futbolçy boldy diýip, championat.com habar berýär.
Belläp geçsek, şu günki oýnuň dowamynda Messi ilki birinji taýmda gol geçirip, soňra penaltide pökgini tora girizip tapawutlandy.
Şu güne çenli Messiniň hasabynda 43 titul bardy. Karýerasyny tamamlan braziliýaly goragçy Dani Alwesiň hem şonça baýragy bar. Indi argentinaly oýunçy 44-nji kubogyny gazanyp, ýeke-täk lider boldy.
