2017-nji ýyldan bäri dowam eden Apple kompaniýasy bilen bagly kazyýet işi ahyrynda tamamlanmaga ýakynlady. Indi Apple zyýan çekenlere kompensasiýa tölär diýip, tengrinews.kz habar berýär.
Köne iPhone smartfonlarynyň eýeleriniň toparlaýyn şikaýaty boýunça kazyýet işi alty ýyl dowam etdi. Işiň materialynda Apple kompaniýasynyň iOS 10-yň relizinden soň öňki nesilleriň gurluşlarynyň işini bilkastlaýyn haýalladandygy we şeýlelik bilen, olaryň eýelerini has täze modelleri satyn almaga höweslendirendigi bellenilýär. Ýöne müşderiler mundan bihabardy.
Prosesiň dowamynda gurluşlaryň öndürijiliginiň gizlin peseldilmegi taryhda sarp edijilere garşy iň uly kezzapçylyklaryň biri diýlip atlandyryldy. Şeýlelikde, kompaniýa bu hereketiň netijesinde zyýan çeken adamlara 500 mln dollara çenli tölemäge razy boldy. Bu kompensasiýany, takmynan, üç million iPhone 6, 6 Plus, 6s, 6s Plus, 7, 7 Plus we iPhone SE smartfonlarynyň eýeleri 2020-nji ýylyň oktýabr aýyna çenli töleg almak üçin ýüz tutan bolsalar alyp bilerler.
Şeýle-de, Apple kazyýet işinden soň könelen akkumulýatorly gurluşlary ulanyjylara saýlamak mümkinçiligini hödürledi. Olar ýa-ha öndürijiligiň peselmegine razy bolup, ýöne batareýanyň uzak wagtlap işlemegine ynam edip bilýärler, ýa-da haýalladylmadan ýüz öwrüp bilýärler.
Täze modellerde bu funksiýany dolandyryp bolýar. Ony sazlamalar menýusynyň “Akkumulýatoryň ýagdaýy” bölüminden öçürmek we ýakmak bolar.
