Hytaýyň Fourier Intelligence startapy 2023-nji ýylyň ahyryna çenli adama meňzeş GR-1 robotlarynyň köpçülikleýin önümçiligini işe girizer. Bu barada South China Morning Post habar berýär diýip, runews24.ru belleýär.
Habar berlişi ýaly, kompaniýa öz önümçiliginden 1000 roboty bazara ibermegi meýilleşdirýär. Fourier-iň ýerine ýetiriji müdiri Aleksa Gu şeýle robotlaryň bir böleginiň emeli intellekti öwrenmek we işläp düzmek bilen meşgullanýan kompaniýalara we uniwersitetlere eýýäm iberilendigini belledi.
Hünärmenleriň nygtamagyna görä, robotlara ýokary intellekt öwredilmez. Olaryň wezipesi birmeňzeş ýa-da howply işleri ýerine ýetirmekden ybarat. Şeýle-de bolsa, robotlara emeli intellektli çat-botlaryň oturdylmagy olaryň adamlar ýaly pikirlenip bilmegine sebäp bolar.
Ýatlap geçsek, Fourier kompaniýasy 2015-nji ýylda esaslandyryldy we ol robototehnikany işläp düzmeklige ýöriteleşýär.
Kompaniýanyň inženerleri robot-gumanoidleri döretmek bilen 2019-njy ýylda meşgullanyp başladylar, ýöne diňe 2022-nji ýylda bu ugurda üstünlik gazanyp bildiler. Şonda olaryň 1,65 m beýiklikdäki roboty ilkinji gezek “aýaga galyp, ýöremegi öwrendi”. 2023-nji ýylyň iýul aýynda sagatda 5 km tizlik bilen hereket etmäge we 50 kg çenli ýüki götermäge ukyply bolan GR-1 Şanhaýda geçirilen emeli intellekt boýunça Bütindünýä konferensiýasynda (WAIC) hödürlendi we ony döredijiler üçin garaşylmadyk üstünlik boldy.
