Italiýaly Ýannik Sinner Kanadanyň Toronto şäherinde geçirilen “Masters” tennis ýaryşynyň finalynda awstraliýaly Aleks de Minaury utdy. Ýaryşyň baýrak gaznasy 6,6 mln dollara barabar diýip, rsport.ria.ru habar berýär.
Duşuşyk 6:4, 6:1 hasabynda ýaryşda ýedinji belgi bilen ýerleşdirilen 21 ýaşly italiýalynyň peýdasyna tamamlandy. Tennisçiler kortda 1 sagat 29 minut sarp etdiler.
Sinner karýerasynda ilkinji gezek “Masters” ýaryşynyň ýeňijisi boldy. Öň, ol Maýamide bu ýaryşyň finalyna iki gezek çykypdy. Umuman, bu dünýä reýtinginde sekizinji orny eýeleýän italiýaly üçin Professional tennisçileriň assosiasiýasynyň (ATP) sekizinji titulydyr. Bu ýeňşiň netijesinde ol dünýäniň altynjy raketkasy bolar we özüniň iň gowy görkezijisini täzelär. De Minaur ATP reýtinginde 18-nji orny eýeleýär, ol karýerasynda “Mastersiň” finalyna ilkinji gezek çykdy.
