Belarusda geçirilýän GDA ýurtlarynyň II oýunlarynda türkmen boksçylary ýurdumyzyň medal sanynyň üstüni 1 sany kümüş we 2 sany bürünç medal bilen ýetirdiler.
Belta habarlar agentliginiň habar bermegine görä, 12-nji awgustda geçirilen boks boýunça ýaryşlaryň jemi boýunça Anuşerwon Fazylow 51 kg çenli agram derejesinde kümüş medal gazandy. Bu agram derejede altyn medaly russiýaly Wýaçeslaw Rogozin, bürünç medallary belarusly Daniil Kokorew we özbegistanly Miralijon Mawlonow aldy.
71 kg çenli agram derejede türkmen türgeni Ylham Nazarow bürünç medal aldy. Bu agram derejede altyn medaly özbegistanly Şawkadjon Boltaýew, kümüş medaly azerbaýjanly Ziýa Gasanow, ýene bir bürünç medaly russiýaly Artýom Kostin aldy.
75 kg çenli agram derejede ildeşimiz Yhlas Bagtyýarow bürünç medal aldy. Bu agram derejede özbegistanly Fazliddin Erkinboýew altyn, azerbaýjanly Farhad Şeýdaýew kümüş medal aldy. Ýene bir bürünç medaly russiýaly Iwan Rodionow aldy.
GDA ýurtlarynyň II oýunlarynyň ýapylyş dabarasy 13-nji awgustda «Minsk-Arenada» geçiriler.
