«Xiaomi Grup» kompaniýasynyň prezidenti Lu Weýbin Hytaýyň “Weibo” sosial ulgamyndaky sahypasynda 14-nji awgustda tanyşdyryljak «Redmi K60 Extreme Edition» flagman smartfonynyň aýratynlyklaryny paýlaşdy.
«Redmi K60 Extreme Edition-yň» öndürijiligini «MediaTek Dimensity 9200+» çipi we 24 GB çenli operatiw ýat we 1TB sygymly içki ýat üpjün ediler. Mundan başga-da, «Redmi» brendiniň smartfonynda ilkinji gezek IP68 standartyna laýyklykda çyglylyga we tozana garşy gorag ornaşdyrylar.
Şeýle hem «Redmi K60 Extreme Edition-yň» 1,5K durulygy we 144 Gs şekili täzeleýiş ýygylygy bolan OLED ekrany bilen üpjün ediljekdigi bellendi. Ekranda şekiliň hilini ýokarlandyrmak üçin ýörite «PixelWorks X7» çipi ýerleşdiriler.
Weýbiniň bellemegine görä, smartfonda flagman derejesindäki kameralar, ýagny optiki we elektroniki stabilizasiýa bilen 1/1.49 dýuýmlyk «Sony IMX800» sensory ornaşdyrylar. Bu datçik «Xiaomi 13» modelinde hem ulanyldy. «Redmi K60 Extreme Edition-yň» kamerasy «Xiaomi Imaging Brain 2.0» atly şekili gaýtadan işlemek tehnologiýasy bilen hem üpjün ediler.
14-nji awgustda «Redmi K60 Extreme Edition» bilen bilelikde «Xiaomi Mix Fold 3» eplenýän smartfony, «Pad 6 Max» planşeti we «Band 8 Pro» fitnes trekeri tanyşdyrylar.
