Iýul aýynyň ahyrynda kino dünýäsinde möhüm çäre bolan “Emmi 2023-iň” ssenariýaçylaryň we aktýorlaryň iş taşlaýyşlary sebäpli yza süýşürilendigi belli boldy. Şol wagt täze sene kesgitlenmändi, indi Amerikan telewizion akademiýasy bu çäräniň 15-nji ýanwarda geçiriljekdigini habar berýär diýip, championat.com belleýär.
Ýeri gelende aýtsak, bu 2001-nji ýyldan bäri “Emmi” baýragynyň gowşurylyş dabarasynyň ilkinji gezek yza süýşürilmesidir. Şol wagt çäre 11-nji sentýabrdaky terroristik hereket we ABŞ-nyň goşunynyň Owganystana çozup girmegi sebäpli soňa goýlupdy.
“Emmi 2023” gyş möwsüminde geçirilse-de, baýrak 2022-nji ýylyň iýun aýyndan 2023-nji ýylyň maý aýy aralygynda çykarylan taslamalara berler.
“Emmi” halkara baýragy “Oskaryň” (kino), “Gremminiň” (aýdym-saz) we “Toniniň” (teatr) telewizion ekwiwalenti hasaplanýar. Ilkinji gezek ol 1949-njy ýylyň 25-nji ýanwarynda gowşuryldy, ýöne şonda ýeňijiler diňe Los-Anjelesde ýaýlyma berilýän programmalaryň arasyndan saýlanypdy.
