Saud Arabystanynyň «Al-Hilal» topary Fransiýanyň «Pari Sen-Žermen» toparyna braziliýaly futbolçy Neýmaryň transferi üçin teklip taýýarlaýar.
Bellenilmegine görä, «Al-Hilal» 31 ýaşly hüjümçi üçin 200 million ýewro tölemäge taýyn. Bu pul mukdary «PSŽ-niň» tölegini we futbolçynyň zähmet hakyny öz içine alýar. Neýmar bilen şertnama üç ýyl möhlete niýetleniler. Futbolçynyň özi Saud Arabystanyna göçmek barada pikirlenmeýär, çünki bu ýerde bolmak onuň ýaşaýyş usulyna ters gelýär.
Neýmar «PSŽ» toparyna 2017-nji ýylda «Barselonadan» rekord 222 million ýewro töleg bilen geçipdi. Onuň parižliler bilen şertnamasy 2025-nji ýylyň iýunyna çenli niýetlenendir. 2022/23-nji möwsümde braziliýaly futbolçy toparyň düzüminde 29 duşuşyga çykdy we 18 pökgi geçirdi.
