ABŞ-nyň Irwin şäherindäki Kaliforniýa uniwersitetiniň alymlar topary tebigy efir ýaglary bilen aromaterapiýanyň kognitiw ukyplary 226% gowulandyrmaga mümkinçilik berýändigini ýüze çykardy.
Barlaga 60 – 85 ýaş aralygyndaky 43 adam gatnaşdy. Olary iki topara böldüler, bir topara efir ýaglarynyň ýokary konsentrasiýasy bolan yslar, beýleki topara bolsa az mukdarda ys beriji serişdeler hödürlendi. Yslaryň hatarynda bägüliň, apelsiniň, ewkaliptiň, limonyň, narpyzyň, rozmariniň we lawandanyň ýaglary bardy. Ys beriji enjamlar alty aýyň dowamynda her agşam iki sagatlap dürli yslary ýaýradýardylar. Barlagyň başynda we ahyrynda oňa gatnaşyjylar MRT arkaly gözden geçirildi hem-de neýropsihologik synagdan geçirildi.
Alymlar ýokary konsentrasiýaly ýaglardan dem alan adamlaryň kognitiw ukyplarynyň ýatkeşlik boýunça synagda beýlekilere görä 226% artandygy hasaba alyndy. MRT barlagynyň netijeleri olaryň beýnisiniň çözgütleri kabul etmäge jogap berýän böleginiň işiniň gowulanandygyny görkezdi. Barlagdan geçenler ukylarynyň has rahat bolandygyny hem bellediler.
Ys alyş ulgamy bilen beýniniň arabaglanyşygy ozaldan hem mälimdir. Ys alyş ukybyny ýitirmek 70-e golaý newrologiki we psihiatriýa keselleriniň, şol sanda Alsgeýmer, Parkinson, şizofreniýa keselleriniň döremegine sebäp bolup biler.
