Apple kompaniýasyny esaslandyryjy Stiw Jobsyň ogly Rid Jobs kakasynyň ölümine sebäp bolan rak keselini bejermegiň täze usullaryny maliýeleşdirmek üçin wençur firmasynyň döredilýändigini mälim etdi. Bu barada forbes.kz habar berýär.
Yosemite adyny alan bu firma merhum Stiw Jobsyň aýaly Loren Pauell Jobs tarapyndan esaslandyrylan Emerson Collective maýa goýum, sosial we haýyr-sahawat kompaniýasynyň bölümçesi boldy. The New York Times-iň belleýşi ýaly, Yosemite firmasy öz adyny Stiw bilen Loreniň durmuş guran ýeri bolan Kaliforniýa ştatyndaky Sýerra-Newada daglarynda ýerleşýän Ýosemite milli seýilgähinden alypdyr. Forbes USA-nyň maglumatlaryna görä, Jobsyň wençur firmasy eýýäm maýadarlardan 200 mln dollar çekdi, olaryň arasynda milliarder Jon Dorr, Sloan-Kettering adyndaky Memorial onkologiýa merkezi, Rokfeller uniwersiteti we Massaçusets tehnologiýa instituty bar.
Ýatlap geçsek, Stiw Jobs 2011-nji ýylda 56 ýaşynda aşgazanasty mäziniň rak keselinden aradan çykdy. Loren Pauell Jobs Emerson Collective kompaniýasyny 2004-nji ýylda esaslandyrdy. Adamsy aradan çykandan soň, ol kompaniýa ýoldaşyndan miras galan Apple-iň we Disney-iň milliard dollarlyk paýnamalarynyň bir bölegini maýa goýdy. 31 ýaşly Rid Jobs Emerson Collective-de saglygy goraýyş meseleleri boýunça dolandyryjy müdir bolup işleýär. Öň, ol onkolog bolmak üçin taýýarlaýjy lukmançylyk mekdebinde okady, ýöne kakasy aradan çykandan soň okuwyny taşlap, hünärini taryha üýtgetdi.
