Amazon geçen ýyl bahasynyň 14,6%, 299,3 mlrd dollara çenli pese gaçandygyna garamazdan, iň gymmat tehnologiýa brendleriniň reýtinginde birinji orny eýeleýär. Bu barada Brand Finance konsalting kompaniýasynyň ýyllyk hasabatynda aýdylýar diýip, interfax.ru habar berýär.
Geçen ýylky reýtingde birinji orny eýelän Apple brendi ikinji orna düşdi. Onuň bahasy 16,2%, 297,5 mlrd dollara çenli pese gaçdy. Üçünji orny Google brendi eýeleýär ($281,4 mlrd).
Hytaýyň Huawei brendine global syýasy ýagdaýlar, ýarym geçiriji komponentleriň ýetmezçiligi we dünýäde smartfonlara bolan islegiň pese gaçmagy bilen baglanyşykly kynçylyklara garamazdan, iň gymmat tehnologiýa brendleriniň onlugynda galmak başartdy. Bu kynçylyklar sarp ediş gurluşlarynyň sferasynda Huawei-niň amallaryna düýpli täsir etdi, ýöne kompaniýanyň işiniň korporatiw segmenti we aragatnaşyk enjamlaryny çykarmak ýaly ugurlary gowy netijeleri görkezdi.
Geçen ýyl Huawei brendiniň bahasy 38% pese gaçyp, 44,3 mlrd dollar boldy.
Şu ýyl iň çalt ösýän tehnologiýa brendi Ýaponiýanyň IT kompaniýasy NTT DATA boldy (+55%, $8,9 mlrd). Ösüş depgini boýunça ikinji orny LinkedIn sosial ulgamy eýeledi – brendiň bahasy 49% ýokarlanyp, 15,5 mlrd dollara ýetdi.
