Kriştianu Ronaldu 2017-nji ýyldan bäri ilkinji gezek (we umumylykda üçünji gezek) Forbes neşiriniň hasaby boýunça dünýäniň iň köp girdeji gazanan türgenleriniň sanawynda birinji orny eýeläp, 2023-nji ýylda iň ýokary ýyllyk gazanjy üçin Ginnesiň rekordlar kitabyna girdi. Bu barada rekordlar kitabynyň saýtynda habar berilýär.
Hasaplamalara görä, 2023-nji ýylyň 1-nji maýyna çenli (köp sport möwsümleriniň tamamlanýan senesi) 12 aýyň dowamynda Ronaldu 136 mln dollar (107,5 mln funt sterling) gazandy. Ronaldu, takmynan, 130 mln dollar (103 mln funt sterling) bilen 2022-nji ýylyň iň köp girdeji gazanan türgeni bolan Messiden tituly aldy. Ronaldunyň rekord girdejisi meýdançada gazanan 46 mln dollar (35 mln funt sterling) zähmet hakyndan we meýdançadan daşary 90 mln dollardan (68,5 mln funt sterling) ybarat.
2022-2023-nji ýylyň iň köp girdeji gazanan türgenleriniň üçlügini Lionel Messi bilen Kilian Mbappe jemleýär. Messi 130 mln dollar bilen ikinji orny eýeledi, ýagny ol meýdançada 65 mln dollar we meýdançadan daşary hem 65 mln dollar girdeji gazandy. Mbappeniň meýdançada gazanan 100 mln dollar girdejisi onuň 120 mln dollar bolan umumy girdejisiniň ep-esli bölegini düzýär.
119 mln dollar bilen dördünji orny eýelän Lebron Jeýms 2023-nji ýylda basketbolçy üçin iň ýokary ýyllyk girdeji boýunça rekord goýdy, şol bir wagtyň özünde bäşinji orny eýelän Kanelo Alwares 2023-nji ýylda boksçy üçin iň ýokary ýyllyk girdeji boýunça rekord goýdy – 110 mln dollar.
2022-nji ýylyň sentýabr aýynda ikisiniň hem pensiýa çykandygyna garamazdan, Rojer Federer we Serena Uilýams, degişlilikde 2023-nji ýylda erkek tennisçi üçin iň ýokary ýyllyk girdeji we 2023-nji ýylda zenan tennisçi üçin iň ýokary ýyllyk girdeji gazandy.
Umumy sanawda dokuzynjy orny eýelän Rojer, umumy alanyňda, 95,1 mln dollar gazandy. 49-njy orny eýelän Serena bolsa, umuman, 45,3 mln dollar gazandy.
