Türkmen režissýory Sahysalyh Baýramowyň «Gyzyl kürte» filmi Gyrgyzystanyň «Ak ilbirs» (Ak bars) milli kinobaýragynyň «Merkezi Aziýanyň iň gowy filmi» baýragyna dalaşgärleriň sanawyna goşuldy diýip, AKIpress habar berýär.
Kinematografiýa sungatlarynyň Merkezi Aziýa akademiýalarynyň baş baýragyna ýene-de iki sany film dalaş eder — Gazagystandan režissýor Darežan Omirbaýewiň «Akyn» filmi hem-de özbek režissýory Ýolkin Tüýçiýewiň «Ewolýusiýas» filmi.
Ýeňijiler kinobaýragynyň gowşurylyş dabarasynda — 8-nji iýulda belli bolar.
Oguz han adyndaky «Türkmenfilm» kinostudiýasynyň «Gyzyl kürte» filmi 2022-nji ýylda ekranlara çykdy. Film bolan wakalara esaslanyp, Beýik watançylyk urşy ýyllarynyň wakalary hem-de türkmen zenanlarynyň watanparazlygy hakynda gürrüň berýär.
