Eýran Yslam Respublikasynda gaz merkezini döretmek boýunça Russiýa bilen geçirilen gepleşiklere Eýran ýokary baha berýär. Muny Eýranyň nebit ministri Jawad Ouji žurnalistlere OPEK-iň sekizinji halkara seminarynyň çäginde aýtdy diýip, TASS habar berýär.
"Eýranyň gaz merkezi boýunça Russiýa bilen örän oňat gepleşikleri alyp barýarys" diýip, ol gepleşikleriň iki aý mundan öň başlanandygyny sözüniň üstüne goşdy.
Ouji Eýranyň merkezi döretmek üçin uly gaz gorlarynyň we infrastrukturasynyň bardygyny aýtdy. “Gaz gorlary boýunça Katar, Türkmenistan ýaly goňşularymyz hem ajaýyp mümkinçiliklere eýe. Bu faktorlar Eýrany sebitdäki gaz merkezine öwürmek üçin ajaýyp mümkinçilik döredýär "- diýip, ministr belledi.
Ol Eýranyň dürli ýurtlar bilen üstünlikli gepleşikleri geçirýändigini nygtady.
Ouji ozal Russiýanyň, Kataryň we Türkmenistanyň gatnaşmagynda Eýranyň Pars aýlagynyň demirgazyk kenaryndaky Buşehr welaýatynda ýerleşýän Assaluye senagat sebitinde gaz merkezini döretmegi meýilleşdirýändigini aýdypdy.
OPEK-iň 8-nji halkara seminary 5-6-njy iýulda Wenadaky Hofburg köşgünde geçirildi. Oňa OPEK ýurtlarynyň ministrleri we beýleki nebit öndürijiler, halkara guramalaryň ýolbaşçylary we dünýäniň iň uly energiýa kompaniýalarynyň ýolbaşçylary gatnaşdy. Çäräniň esasy mowzugy “Durnukly we inklýuziw energiýa geçişine tarap”.
