Ýaponiýanyň premýer-ministri we dolandyryjy Liberal-demokratik partiýasynyň başlygy Fumio Kisida 2022-nji ýylda jemi 38,6 million ýen (267,2 müň dollardan gowrak) girdeji gazandy. Parlamentdäki deputatlaryň gazançlary barada duşenbe güni çap edilen maglumatlara görä, ol girdejisi taýdan parlamentde wekilçilik edilýän beýleki partiýalaryň ýolbaşçylaryndan öňe geçdi.
Bu görkeziji boýunça ikinji ýerde kommunistleriň lideri Kadzuo Sii durýar. Ol 2022-nji ýylda 20,5 million ýenden (142 000 dollar) gowrak girdeji gazandy. Bu mukdaryň ep-esli bölegi geçen ýyl Ýapon kommunistleriniň programmasy barada çap edilen teswirler üçin töleg boldy. Kisidadan tapawutlylykda, parlamentde wekilçilik edilýän beýleki syýasy partiýalaryň ýolbaşçylarynyň girdejileri onuň orunbasarlarynyň ortaça gazançlaryndan pes, ýagny takmynan 21,6 million ýen (149,1 müň dollar) boldy.
Häkimiýet başyndaky LDP-nyň wekilleri yzly-yzyna altynjy ýyl parlamentdäki girdejileri boýunça öňdelikçi bolup galýarlar. 2022-nji ýylda olaryň ortaça girdejisi 22,8 million ýen (158 000 dollar töweregi) boldy. Iň köp girdeji gazanan 10 deputatyň sanawynda liberal demokratlar ýedi orny eýeleýär.
Kisidanyň girdejisi premýer-ministr wezipesindäki aýlygyndan we parlament agzasyna degişli töleglerinden, neşirleri üçin hakujy haklaryndan, tölegli çykyşlardan alýan girdejilerinden we ş.m. ybarat. Ýaponiýanyň hökümetiniň başlygy 2022-nji ýylda öňküsinden takmynan 10,3 million ýen (71 müň dollar) köp gazandy.
