Gajetleriň komponentlerini täze gurluşlary döretmek üçin gaýtadan işlemek mümkinçiligine garamazdan, häzirki wagtda dünýäde 5 milliarddan gowrak ykjam telefon adamlar tarapyndan ulanylmaýar. Bu barada dünýädäki ykjam aragatnaşyk operatorlarynyň bähbitlerine wekilçilik edýän GSMA söwda guramasynyň gözleginde aýdylýar diýip, gazeta.ru habar berýär.
Şunuň bilen baglylykda, GSMA-da aragatnaşyk operatorlarynyň gatnaşmagynda ykjam gurluşlary gaýtadan işlemek prosesini çaltlaşdyrmak we ýönekeýleşdirmek boýunça täze taslama yglan edildi. Dünýäniň 12 sany öňdebaryjy operatory gaýtadan işlemek üçin öýjükli gurluşlaryň yzyna gaýtarylma ýagdaýlarynyň sanyny artdyrmaga borçlandy.
“2030-njy ýyla çenli operatorlar tarapyndan yzyna gaýtaryş shemalary boýunça ýygnalan öň ulanylan ykjam gurluşlaryň sany gönüden-göni müşderilere satylan täze ykjam gurluşlaryň sanynyň azyndan 20%-ine barabar bolar” – diýlip, taslamada aýdylýar.
Şeýle-de, operatorlar 2030-njy ýyla çenli operatorlar tarapyndan yzyna gaýtaryş shemalary boýunça ýygnalan öň ulanylan ykjam gurluşlaryň 100%-iniň abatlanjakdygyna, gaýtadan ulanyljakdygyna ýa-da gaýtadan işlemek üçin guramalara beriljekdigine borçlandylar.
GSMA-nyň hasabyna görä, dogry gaýtadan işlenilen ýagdaýynda bäş milliard ykjam gurluş 8 milliard dollarlyk altyny, palladiýi, kümşi, misi, seýrek duş gelýän toprak elementlerini we beýleki zerur minerallary dikeldip biler hem-de elektromobiller üçin 10 mln akkumulýatoryň önümçiligi üçin ýeterlik kobalty üpjün edip biler.
