Dame mit Fächer (“Ýelpewaçly hanym”) taryha girdi. Awstriýaly suratkeş Gustaw Klimtiň bu kartinasy Sotheby’s auksionyndan 74 mln funt sterlinge (86 092 340 ýewro ýa-da 94 million dollardan gowrak) satylyp, Ýewropada häli-häzire çenli satylan iň gymmat surat hökmünde täze rekord goýdy. Bu barada Euronews.com habar berýär.
Teklipler biri-biriniň yzyndan başyňy aýlaýjy tizlik bilen dowam edip, ahyryna çenli dartgynlylygy saklady. Häzirlikçe soňky 29 ýyl bir maşgalanyň elinde bolan kartinany kimiň satyn alandygy belli däl.
“Ýelpewaçly hanym” Klimtiň iň gowy eserleriniň biri we, çak edilişi ýaly, onuň karýerasyndaky iň soňky portret hasaplanýar. Ol bu suraty 1917-1918-nji ýyllarda, 55 ýaşynda garaşylmadyk ölüminden birnäçe aý öň çekipdir.
Mundan öň Ýewropada auksiondan satylan iň gymmat sungat eseri 65 mln funt sterlinge (76 mln ýewro) satylan Alberto Jakomettiniň bürünç heýkeli “Ädimleýän adam I-di”.
