Polşanyň Lodz şäherinden Fabrikant atly dub agajy “2023-nji ýylyň Ýewropa agajy” baýragyny aldy. 180 ýaşly bu agajyň ýeňiş gazanmagy üçin tas 46 müň adam ses berdi diýip, euro-pulse.ru habar berýär.
Dub agajy XIX asyryň ahyrynda döredilen we Lodz tehnologiýa uniwersitetiniň çäginde ýerleşýän Lodz seýilgähiniň baş alleýasynda ösýär. Agajyň şahalarynyň biri s-şekilli bolup, onuň uzynlygy 20 metrden gowrakdyr. 33 metrlik başy bolan dubuň aşagynda bolsa talyplar ýygnanyşmagy gowy görýärler.
Ikinji orna Slowakiýadan Aždarha duby mynasyp boldy. Oňa 18 müň adam ses berdi. Agaç öz şekili bilen oturan aždarhany ýada salýar. Rowaýatlara görä, takmynan, 700 ýyl dub ýerli ýaşaýjylary basybalyjylardan gorapdyr.
Üçünji orny 14 müň ses bilen Krolewesden alma agajynyň koloniýasy eýeledi. Alma agajynyň özbaşdak kök urmaga ukyply bolan 15-e golaý ýere ösen şahasy bar: haçan-da şahalaryň biri ölende olar ýere eglip, kök urýarlar. Şeýlelik bilen, alma agajy öz ömrüni uzaldýar.
“Ýylyň Ýewropa agajy” – bu Ýewropanyň tebigy we medeni mirasynda garry agaçlaryň ähmiýetini görkezmek üçin 2011-nji ýyldan bäri her ýyl geçirilýän bäsleşik. Geçen ýyl Polşadan Dunin duby ýeňiji boldy.
