Beýik Britaniýada 2022-nji ýylda kriptowalýuta eýeleriniň sany iki esse artdy. Bu barada ýurduň Maliýe gözegçiligi edarasyna (FCA) salgylanyp, interfax.ru habar berýär.
Geçirilen pikir soraşmanyň netijesine görä, geçen ýyl her onunjy britaniýalynyň diýen ýaly kriptowalýutasy bolup, bu bir ýyl ozalky görkezijiden iki esse ýokarydyr. Kriptowalýuta eýeleriniň sany FCA-nyň olaryň islendik wagt ähli maýa goýumlaryny ýitirmäge taýýar bolmalydygy baradaky duýduryşlaryna garamazdan artýar diýip, Financial Times belleýär.
“Kriptowalýutany satyn almaly ýa-da almaly däldigini adamlaryň özi çözýär. Biziň düzgünlerimiz adamlara oýlanyşykly netije çykarmak üçin wagt we töwekgelçilikler barada dogry duýduryşlary berýär” – diýip, FCA-nyň sarp edijileriň hukuklaryny goramak we bäsdeşlik bölüminiň ýolbaşçysy Şeldon Mills belleýär.
FCA-nyň pikir soraşmasyna gatnaşan 2 müň uly ýaşly britaniýalynyň, takmynan, 36%-i kriptowalýutanyň mahabatyny görendigini ýa-da eşidendigini aýtdy. Şol bir wagtyň özünde, öň kriptowalýutalara biperwaý bolan adamlaryň dörtden bir bölegi mahabat kampaniýalarynyň täsiri bilen olara gyzyklanma bildirip başlady.
Mills 8-nji oktýabrdan ýurtda kriptowalýuta gurşawynda mahabat düzgünleriniň berkeýändigini ýatlap geçdi. Aýratynam, “dostuňy getir we sowgat al” ýaly aksiýalar gadagan ediler. Täze düzgünler Beýik Britaniýadan bolan müşderiler üçin ýurtda ýa-da daşary ýurtdadygyna garamazdan kriptoaktiwleri satmak bilen meşgullanýan ähli kompaniýalara degişli bolar.
