Konferensiýalar ligasynyň finalynda «West Hem» iňlis futbol klubunyň oýunçylary Italiýanyň «Fiorentinasyndan» üstün çykdylar. Pragada geçirilen duşuşyk 2:1 hasabynda tamamlandy.
Duşuşygyň 62-nji minudynda Said Benrahma 11 metrlik jerime urgusyny dürs ýerine ýetirip hasaby açdy. 67-nji minutda «Fiorentina» Jakomo Bonawenturanyň tagallalary bilen hasaby deňlemegi başardy. Ýeňiş goluny «West Hemden» Jarrod Bouen duşuşygyň soňky minutlarynda geçirdi.
Bu ýeňşi mynasybetli «West Hem» indiki möwsümde Ýewropa ligasynyň toparlaýyn tapgyrynda çykyş etmäge hukuk gazandy. Şu möwsümiň jemleri boýunça «West Hem» Angliýanyň Premýer ligasynda 14-nji orny eýeläpdi.
