Apple kompaniýasy täze MacBook Air noutbugyny, Mac Pro stolüsti kompýuterlerini we ykjam Mac Studio-ny hödürledi. Tanyşdyryş Kupertino (Kaliforniýa ştaty) şäherindäki Apple Park kompaniýasynyň baş edarasynda Apple Worldwide Developers konferensiýasynda (WWDC) geçirildi we YouTube-da göni ýaýlyma berildi.
Täzelikleri korporasiýanyň başlygy Tim Kuk, Apple-iň enjamlar bölüminiň müdiri Jon Ternus we toparyň wise-prezidenti Keýt Beržeron hödürledi.
Täze MacBook Air — agramy 1,4 kg bolan 15,3 dýuýmlyk ýeňil noutbuk. Öňki 13 dýuýmlyk wersiýa bilen birmeňzeş reňkde - altyn, kümüşsöw we «çal kosmos» reňkde görkezilýär.
Enjam M2 çipi, täze displeý we gulaklyklar üçin 3,5 mm-lik deşik bilen enjamlaşdyrylandyr. MacBook Air 18 sagat awtonom görnüşde işläp biler. MacBook Air noutbugynyň bahasy 1299 dollardan başlaýar.
Mac Studio stolüsti kompýuteri M2 Max we M2 Ultra prosessorlary bilen üpjün edilýär. Apple M2 Max-y şahsy kompýuter üçin döredilen iň güýçli prosessor diýip atlandyrýar.
Şeýle hem, Mac Studio 76 ýadroly grafiki prosessor bilen enjamlaşdyrylandyr, bu enjamyň öňki wersiýasyndan 30% çaltdyr. Mac Studio-nyň bahasy 1999 dollardan başlaýar.
Mac Pro stolüsti kompýuteri M2 Ultra çipi bilen hem enjamlaşdyrylandyr. Ol Intel esasly Mac kompýuterlerinden üç esse çalt işleýär diýip, korporasiýanyň wekilleri aýtdylar. Kompýuter minara korpusynda-da, söýeli görnüşde-de hödürlenýär. Enjamyň bahasy 6999 dollardan başlaýar. Kompýuterler şu hepde satuwa çykarylar.
