Türkmenistanyň Prezidenti Serdar Berdimuhamedow Hindistan Respublikasynyň Prezidenti hanym Draupadi Murmuwa we bu ýurduň Premýer-ministri Narendra Modä Hindistanyň Odişa ştatynda bolup geçen, köp sanly adam pidalaryna we şikes ýetmelerine getiren pajygaly otly heläkçiligi zerarly gynanç hatyny iberdi. Bu barada «Watan» habarlar gepleşiginde habar berildi.
Bellenilişi ýaly, döwlet Baştutany şu agyr pursatda Türkmenistanyň halkynyň we Hökümetiniň adyndan, şeýle hem hut öz adyndan, gurban bolanlaryň dogan-garyndaşlaryna we ýakynlaryna ýürekden gynanjyny we medet beriji sözlerini beýan etdi, ejir çekenlere bolsa tiz wagtda sagalmaklary baradaky dileglerini aýtdy.
2-nji iýunda Hindistanda Balasor şäherinden uzak bolmadyk ýerde otlular çaknyşdy. Maglumatlara görä, Kalkuttadan Çennai şäherine barýan ýolagçy otlusynyň 10-12 wagony çaknyşyk zerarly relsden çykyp, gapdaldaky relslere düşüpdir. Birnäçe wagtdan bu wagonlara gapdal relsden hereket edip gelen ýene-de bir ýolagçy otlusy gelip çaknyşypdyr. Netijede ýene-de 3-4 wagon relsden çykypdyr.
Üç sany otlynyň çaknyşygynda aradan çykanlaryň sany 288-e ýetdi diýip, Frans Press agentligi ştatyň ýangyn howpsuzlyk gullugynyň başlygy Sudhanşu Sarangä salgylanyp habar berdi.
