“Pari Sen-Žermeniň” hüjümçisi Lionel Messi möwsüm tamamlanandan soň topary terk eder diýip, fransuz futbol klubunyň baş tälimçisi Kristof Galtýe habar berdi. Muny sport-interfax.ru ýetirýär.
“Maňa futbol taryhynda iň gowy oýunça tälimçilik etmek bagty miýesser etdi. “Klermona” garşy oýun onuň üçin “Park de Prensde” iň soňky oýun bolar” – diýip, L’Equipe tälimçiniň sözlerini getirýär.
35 ýaşly Messiniň “PSŽ” bilen häzirki şertnamasy 2023-nji ýylda tamamlanýar, bu topar üçin ol 2021-nji ýyldan bäri çykyş edip gelýär. Argentinaly oýunçy iki gezek Fransiýanyň çempiony boldy, bir gezek ýurduň Super kubogyny utdy.
Öň, HBS Messiniň Saud Arabystanynyň “Al-Hilýal” klubuna geçmek barada ylalaşandygyny habar beripdi.
Fransiýanyň çempionatynyň 38-nji tapgyrynyň “PSŽ” – “Klermon” oýny 3-nji iýunda geçiriler we Aşgabat wagty bilen sagat 0:00-da başlar.
