Şu gün, 24-nji maýda Russiýa Federasiýasynyň Türkmenistanda täze bellenen Adatdan daşary we Doly ygtyýarly ilçisi Iwan Wolynkini Prezident Serdar Berdimuhamedowa ynanç hatyny gowşurdy. Bu barada «Watan» habarlar gepleşiginde habar berildi.
Serdar Berdimuhamedow RF-iň doly ygtyýarly wekilini ýokary diplomatik wezipä bellenilmegi bilen gutlap, netijeli döwletara gatnaşyklaryň mundan beýläk-de pugtalandyrylmagyna gönükdirilen jogapkärli wezipesinde üstünlikleri arzuw etdi.
Duşuşygyň dowamynda türkmen-rus syýasy dialogyň okgunly ösdürilýändigi, ýokary derejedäki özara saparlaryň amala aşyrylýandygy, ministrlikleriň we pudaklaýyn dolandyryş edaralaryň ugry boýunça yzygiderli gatnaşyklaryň alnyp barylýandygy bellenildi.
Duşuşygyň dowamynda söwda-ykdysady ulgam türkmen-rus hyzmatdaşlygynyň ileri tutulýan ugurlarynyň hatarynda bellenildi. Nebitgaz pudagynda, şeýle hem awtoulag senagaty, gämigurluşyk, awiasiýa ulagy, gazhimiýa we beýleki ulgamlarda oňyn netijeler gazanyldy.
Diplomat türkmen-rus hyzmatdaşlygynyň ösdürilmegine ýardam berjekdigine ynandyrdy.
