Her ýyl ýollarda 1,3 mln töweregi adam aradan çykýar we 50 milliona golaý adam şikes alýar. 5-29 ýaş aralygyndaky adamlar üçin ýol-ulag heläkçiligi (ÝUH) ýaşaýyş üçin esasy howp bolup durýar. Dünýädäki her dördünji ölüm pyýadalaryň we welosipedçileriň paýyna düşýär diýip, 15-nji maýda başlanan Global ýol hereketiniň howpsuzlygy hepdeligi mynasybetli BMG belleýär. Muny news.un.org ýetirýär.
2021-2030-njy ýyllar üçin ýol hereketiniň howpsuzlygyny üpjün etmek boýunça hereket onýyllygynyň global meýilnamasy 2030-njy ýyla çenli ÝUH netijesinde ölüm derejesini we şikes ýetme derejesini 50 göterim azaltmagy maksat edinýär.
“Global meýilnamada adamlaryň howpsuzlygyna gönükdirilen ýollara we ýol ulgamlaryna geçmegiň adam janyny gorap saklamaga mümkinçilik berjekdigi nygtalýar. Ilkinji nobatda, şikes almaga ýakyn adamlaryň: çagalaryň we ýetginjekleriň, aýallaryň, mümkinçiligi çäkli adamlaryň, garry adamlaryň, welosipedçileriň we jemgyýetçilik ulaglaryny ulanyjylaryň bähbitlerini göz öňünde tutmaly. Howpsuz, ygtybarly we ekologiýa taýdan arassa transport jemgyýetçilik durmuşynyň köp ugurlarynda oňyn sosial özgerişlere ýardam eder” – diýlip, BSGG-niň Ýewropa býurosynyň ýolbaşçysy, lukman Hans Klýugeniň beýanynda aýdylýar.
BSGG-niň hyzmatdaşlary bilen hyzmatdaşlykda her ýyl Global ýol hereketiniň howpsuzlygy hepdeligi geçirilýär. Häzirki, ýedinji hepde hereketiň ekologiýa taýdan arassa serişdelerine bagyşlanandyr: gürrüň, esasanam, pyýada ýöremegiň, welosiped sürmegiň we jemgyýetçilik ulaglaryndan peýdalanmagyň zerurlygy barada gidýär.
2030-njy ýyla çenli dünýä ilatynyň, takmynan, 70 göteriminiň şäherlerde ýaşamagyna, şonuň üçin jemgyýetçilik ulaglaryna bolan islegiň hem ep-esli ýokarlanmagyna garaşylýar.
