Bugatti kompaniýasy Dubaýyň merkezinde kaşaň ýaşaýyş jaýyny döretmek meýilnamasyny yglan etdi. Bugatti Residences-iň taslamasyny taýýarlamakda kompaniýa kaşaň gozgalmaýan emläkleri bilen tanalýan ýerli binagärlik şereketi bolan Binghatti ýardam berer.
Megerem, binanyň konsepsiýasy eýýäm taýýar bolmaly, ýöne ony diňe 24-nji maýda ýörite çärede aýan ediler.
Häzirlikçe Bugatti Residences diňiniň çala yşyk berýän örtük bilen basyrylan ilkinji tizeri köpçülige ýetirildi. Onda gökdirän binanyň adatdan daşary saldamly sudury mese-mälim görünýär.
Ýaşaýyş jaýy Bugatti awtoulaglary bilen deňleşip biljek derejede kaşaňlygy bilen saýlanmaly bolar. Şeýle-de bolsa, taslamanyň hyzmatdaşlary ilki bilen rahatlyk hakda däl-de, Bugatti stilindäki aýratyn batyrgaý dizaýn, geljekki binanyň özboluşlylygy we aýratynlygy barada gürrüň edýärler.
Bugatti kaşaň gozgalmaýan emläk bilen gyzyklanmak babatda ilkinji lýuks awtoulag öndürijisi däl. Mysal üçin, geçen tomus Bentliniň Maýamide her bir öýi awtoulag üçin aýratyn liftli ýaşaýyş diňiniň gurluşygyna gatnaşjakdygy habar berlipdi. Öz gezeginde Aston Martin-iň dizaýnerleri hem Tokionyň etraplarynyň biri üçin dört gatly amatlykly jaýy tasladylar.
