«Taliban» hereketiniň esaslandyran Owganystanyň wagtlaýyn hökümetiniň premýer-ministri Muhammet Hasan Ahund saglyk ýagdaýy sebäpli wezipesinden boşadylmagyny haýyş etdi. Bu barada sişenbe güni Al Jazeera teleýaýlymy “Taliban” hökümetindäki çeşmä salgylanyp habar berdi.
Ady agzalmadyk owgan resmi adamsynyň habar bermegine görä, “Taliban” hökümetinde Abdul Kabir wagtlaýyn premýer-ministr wezipesine bellendi. Ol mundan öň Ahundyň syýasy meseleler boýunça orunbasary bolup işleýärdi.
Bu maglumatlary Tolo News owgan teleýaýlymynyň çeşmesi tassyklady. Ýaýlymyň söhbetdeşi Kabiri wagtlaýyn owgan ministrler kabinetiniň başlygy wezipesine bellemegi "Talibanyň" lideri Haýbatulla Ahundzadanyň tabşyrandygyny aýtdy.
