Duşenbe güni dünýäniň üç gezek çempiony Peläniň jaýlanan gonamçylygynda onuň ýadygärligi açyldy. Bu baradaky habar nekropolyň web sahypasynda ýerleşdirildi diýip, TASS ýazýar.
Peläniň mawzoleýine iş günleri sagat 9:00-dan 12:00-a çenli we 14:00-dan -18: 00-a çenli baryp bilersiňiz. Giriş mugt, ýöne munuň üçin öňünden nekropolyň web sahypasynda geljek wagtyňy belletmeli.
Futbolçynyň jesedi salnan tabyt Ginnesiň rekordlar kitabyna dünýäniň iň beýik dik gonamçylygy hökmünde giren, jaýlanmak üçin onuň öz saýlan “Ekumenika” nekropolynyň çägindäki ýörite mawzoleýde goýuldy. Aýnalar zalynyň girelgesi Braziliýanyň we onuň 1956-njy ýylda ilkinji çykyş eden “Santos” futbol klubynyň baýdaklary, şeýle hem Peläniň ellerini döşünde gowşuryp, sag aýagynyň astynda topy saklaýan altynsow reňkli heýkelleri bilen bezelen.
Pele 2022-nji ýylyň 29-njy dekabrynda San-Paulonyň hususy klinikasynda aradan çykdy we şondan bir aý öň göni içegäniň düwnük keseliniň fonunda saglygynyň ýaramazlaşmagy sebäpli kabul edilipdi. Ol 82 ýaşyndady. Şonda Braziliýa üç günlük ýas yglan etdi.
Pele (hakyky ady Edson Arantis du Nasimentu) dünýäde üç gezek (1958, 1962, 1970) dünýä çempionatynda ýeňiji bolan ýeke-täk oýunçy. Pele sport habar beriş serişdeleriniň wersiýasyna görä XX asyryň iň gowy futbolçysy diýlip birnäçe gezek ykrar edildi, ol 100 ýyllyk ýubileýiň dürli simwoliki toparlaryna goşuldy.
