Şweýsariýanyň Ženewa şäherinde geçirilen auksionlarda altyn-kümüş bezegleriniň we şaý-sepleriň satuwyndan alnan mukdar boýunça täze rekord goýuldy. 10-njy we 12-nji maýda geçirilen iki auksionda jemi 176 mln franklyk ($196 mln) kolleksiýa satyldy diýip, forbes.kz habar berýär.
Satuwa awstriýaly milliarder Haýdi Hortene degişli bolan bezegler çykaryldy. Ol telekeçi Gelmut Horteniň dul aýalydy we 2022-nji ýylyň tomsunda aradan çykdy. 2022-nji ýylda Forbes USA Haýdi Horteniň baýlygyny 3 mlrd dollar bilen bahalandyrdy. Auksionda onuň monjuklary, bilezikleri, gulakhalkalary, diademalary we beýleki gymmat bahaly zatlary satyldy. Auksiondan öň olaryň bahasy, takmynan, 150 mln dollar bilen bahalandyryldy.
Täze rekord eýýäm 138,3 mln frank ($154 mln) netije bilen tamamlanan birinji auksionda goýuldy. Ikinji auksion ýene 37,8 mln frank ($42 mln) getirdi. Öňki rekord 12 ýyl mundan ozal goýlupdy: 2011-nji ýylda geçirilen auksionlarda aktrisa Elizabet Teýloryň bezeg şaý-sepleri, takmynan, 137 mln dollara satyldy diýip, Bloomberg belleýär.
