Jonni Depp erkekleriň parfýumeriýasynyň taryhynda iň uly mahabat şertnamasynyň eýesi bolar. Bu barada Variety habar berýär.
Depp 20 million dollara Dior Sauvage atyrynyň ýene-de «ýüzi» bolmaga razylyk berdi. Bu Robert Pattinson bilen Dior-yň (12 million dollar) we Bred Pitt bilen Chanel-iň (7 million dollar) hyzmatdaşlygynyň bahasyndan ep-esli ýokary. Ýyldyzlar mahabat üçin ortaça 3-6 million dollar alýardy.
Deppiň we Dior-yň wekilleri bu barada teswir bermediler. Aktýor Sauvage-i 2015-nji ýyldan bäri mahabatlandyrýar. Kazyýetde öňki aýaly Ember Hýorddan üstün çykandan soň, atyryň satuwy ep-esli artdy.
Deppiň baş keşbi janlandyran täze filmi bolan “Žanna DýuBarri" atly taryhy drama 16-njy maýda Kann film festiwalyny açar. Şeýle hem, ol italýan suratkeşi we binagäri Modilýani hakdaky “Modi” baýopiki bilen režissýorlyga gaýdyp geler.
