9-njy maýda Prezident Serdar Berdimuhamedow 1941-1945-nji ýyllaryň Beýik Watançylyk urşunda gazanylan Ýeňşiň 78 ýyllygy mynasybetli Moskwada geçirilen dabaraly çärelere hormatly myhman hökmünde gatnaşdy.
Kremliň «Tugraly» zalynda Prezident Serdar Berdimuhamedowy Russiýa Federasiýasynyň Prezidenti Wladimir Putin mähirli garşylady.
Iki ýurduň döwlet Baştutanlary birek-birege hoşniýetli sözler aýdyp, ýadygärlik surata düşdüler.
Serdar Berdimuhamedow baýramçylyk dabaralaryna gatnaşmak üçin Moskwa gelen wekilçilikli toparlaryň Baştutanlary bilen bilelikde Gyzyl meýdanyň merkezi münberine tarap ugradylar. Belent mertebeli myhmanlar bu ýerden dabaraly harby ýörişi synladylar.
Dabaraly harby ýöriş tamamlanandan soň, döwlet Baştutanlary Kreml diwarynyň ýanyndaky Aleksandrow bagyna tarap pyýadalap ugradylar. Bu ýerde Näbelli esgeriň guburyna gül goýmak çäresi boldy.
Gussaly owaz astynda döwlet Baştutanlary 2009-njy ýylyň noýabr aýynda Söweşjeň şöhratyň umumymilli toplumy derejesi berlen kaşaň binagärlik toplumyna gül goýdular. Esgerler ýadygärlige gyzyl gülleri goýdular.
Dabaraly çäreler tamamlanandan soň, Prezident Serdar Berdimuhamedow Moskwanyň «Wnukowo-2» Halkara howa menziline geldi we bu ýerden Aşgabada ugrady.
