Amerikan häkimiýetleri 12-nji maýdan ABŞ-a gelýän daşary ýurtlular, şeýle-de federal işgärler we potratçylar üçin COVID-19-a garşy hökmany sanjym talabyny ýatyrýarlar. Bu barada Ak öýüň beýanyna salgylanyp, TASS habar berýär.
"Şu gün biz administrasiýanyň 11-nji maý gününiň ahyrynda federal işgärler, federal potratçylar we halkara awiaýolagçylary üçin COVID-19-a garşy sanjym talaplaryny ýatyrjakdygyny mälim edýäris. Şol gün jemgyýetçilik saglygy goraýyş pudagynda COVID-19 bilen bagly adatdan daşary ýagdaý tamamlanar" - diýlip, resminamada aýdylýar.
Mundan başga-da, Saglygy goraýyş we sosial hyzmatlar ministrligi hem-de ABŞ-nyň Içerki howpsuzlyk ministrligi mekdebe çenli bilim pedagoglaryndan, garrylar we mätäçler üçin Medicare we Medicaid lukmançylyk kömeginiň maksatnamalary boýunça işleýän lukmançylyk edaralarynyň işgärlerinden sanjym talaplaryny aýyrmak prosesini işe girizer. Hökmany sanjym "gury ýer serhetinden geçilende ABŞ-dan bolmadyk käbir raýatlardan" hem talap edilmez.
"Ýakyn günlerde bu talaplary ýatyrmak bilen baglanyşykly goşmaça maglumatlar hödürlener" - diýip, Ak öý belleýär.
Birleşen Ştatlaryň häkimiýetleri 2021-nji ýylyň noýabryndan ýurda girýän daşary ýurtlular üçin koronawirusa garşy doly sanjym alnandygy barada kepilnama talap edip başladylar. Bu düzgünlere laýyklykda, diňe ABŞ-nyň lukmançylyk düzgünleşdirijisi ýa-da Bütindünýä saglygy goraýyş guramasy tarapyndan tassyklanan serişdeler bilen sanjym edilendigi baradaky kepilnamalar kabul edilýär.
