Ýaponiýanyň «Hakuto-R» moduly bilen aragatnaşyk Aýa gonuş pursadynda ýitdi, şonuň üçin bu maksatnamanyň şowsuz hasaplanmagynyň ähtimallygy ýokary. Bu barada sişenbe güni Ispace işläp taýýarlaýjy-kompaniýanyň başlygy Takesi Hakamada habar berdi.
"Häzirki wagtda enjamlar bilen aragatnaşygy ýola goýup bilemzok. Gonuş pursadyna çenli aragatnaşygymyz bardy, ýöne soň ony ýitirdik. Üstünlikli gonup bilmändigimizi boýun almalydyrys" – diýip, ol kompaniýanyň YouTube kanalynda ýaýlyma berlen çykyşynda aýtdy.
Hakamada 26-njy aprelde kompaniýanyň bu meselede bildiriş berjekdigini aýtdy.
Hakuto-R Ýaponiýanyň Tokioda ýerleşýän Ispace kompaniýasy tarapyndan işlenip düzüldi. Enjamyň beýikligi 2,3 m, 2022-nji ýylyň dekabrynda Amerikanyň SpaceX kompaniýasynyň Falcon 9 kysymly raketa-göterijisi bilen Aýa uçurylypdy.
Ol ýere Birleşen Arap Emirlikleriniň dört tigirli “Raşid” Aý ulagyny, Ýaponiýanyň aerokosmos gözleg guramasynyň, oýunjak öndürijisi Tomy-niň we Sony korporasiýasynyň bilelikde işläp düzen iki tigirli ultra ykjam Aý rowerini şeýle hem-de eksperimental berk batareýany eltmelidi.
Üstünlikli bolan ýagdaýynda, Hakuto-R missiýasy dünýäde ilkinji bolup Aýa gonan hususy kosmos gämisi bolar. Şeýle hem, Ýaponiýa modulyny Ýeriň tebigy hemrasyna gonduran dünýäde dördünji ýurt bolmaga mümkinçilik berer. Ozal Sowet Soýuzy, ABŞ we Hytaý muny amala aşyrmagy başarypdylar.
