Aýdymçy we aktrisa Ledi Gaga Jo Baýden tarapyndan medeniýet we sungat boýunça Prezident komitetiniň egindeş başlygy bellendi. Bu barada amerikan lideriniň metbugat gullugy tarapyndan ýaýradylan beýanda aýdylýar diýip, TASS habar berýär.
Resminamada Ledi Gaganyň (hakyky ady Stefani Joann Anjelina Jermanotta) 13 Grammy baýragynyň eýesidigi we taryhda iň üstünlikli ýerine ýetirijileriň biridigi bellenilýär. “Time” žurnaly ony öň dünýäniň iň abraýly 100 adamynyň hataryna hem goşdy. Bellenilişi ýaly, aýdymçy haýyr-sahawat işlerine we käbir jemgyýetçilik kampaniýalaryna-da işjeň gatnaşýar.
1982-nji ýylda döredilen komitet ABŞ-nyň prezidentine we amerikan edaralarynyň ýolbaşçylaryna medeniýet pudagynda syýasat meseleleri boýunça maslahatlary berýär. Onuň ýene bir başlygy hökmünde Baýden prodýuser Brýus Koeni belledi.
Ledi Gaga Baýdeniň saýlawdan öňki kampaniýasynyň çäklerinde geçirilen çärelerde ençeme gezek çykyş edip, ony goldamakda agitasiýa işlerine işjeň gatnaşdy. 2021-nji ýylyň ýanwar aýynda ol Baýdeniň kasam kabul ediş dabarasynda ABŞ-nyň döwlet senasyny ýerine ýetirdi.
