Germaniýanyň Mercedes-Benz Group AG awtoöndürijisi ýanwar-mart aýlarynda 51,6 müň elektromobil satdy, bu geçen ýylyň degişli döwri bilen deňeşdirilende 89% köpdür. Bu barada kompaniýanyň metbugat relizinde aýdylýar diýip, interfax.ru habar berýär.
Birinji çärýekde umumy satuw, esasan, Ýewropa ýurtlaryndaky işjeň ösüş sebäpli 3% ýokarlanyp, 503,5 müň birlige ýetdi. Germaniýada satuw 21%, Italiýada 22%, Ispaniýada 28% ýokarlandy. Umuman, Ýewropada ösüş 8%, Aziýada 3%, Demirgazyk Amerikada 1% boldy.
Şeýlelikde, kompaniýanyň umumy awtoulag satuwynyň 10%-i elektromobilleriň paýyna düşýär. Geçen ýylyň birinji çärýeginde bu görkeziji 6%-e deňdi.
Mercedes-Benz-iň paýnamalary çarşenbe güni söwdada 1,1% ýokarlandy. Ýylyň başyndan bäri kompaniýanyň kapitallaşdyrmasy 13,4%, 72,56 mlrd ýewro çenli ýokarlandy.
