Russiýa Federasiýasynyň Astrahan oblastynyň gubernatory Igor Babuşkin Prezident Serdar Berdimuhamedow bilen duşuşygynda Astrahan bilen Türkmenbaşy şäheriniň arasynda yzygiderli howa gatnawlaryny açmak mümkinçiligini öwrenmegi teklip etdi. Bu barada TASS habarlar agentligi habar berýär.
Belläp geçsek, Russiýa Federasiýasynyň Astrahan oblastynyň gubernatory Igor Babuşkin «Hazar – dostluk deňzi» motoýörişiň kerwenine ýolbaşçylyk edip ýurdumyza geldi.
Duşuşygyň barşynda bilim, ylym we medeniýet, şeýle hem syýahatçylyk ugurlary boýunça däp bolan gatnaşyklary mundan beýläk-de ösdürmegiň meseleleri ara alyp maslahatlaşyldy. Gubernator Astrahan oblastynyň ýokary we ýörite okuw mekdeplerinde Türkmenistandan ýaşlary okatmak meselelerini dowam etmegiň wajypdygyny nygtady. Bellenilişi ýaly, Astrahan oblastynda 1 müňden gowrak türkmenistanly talyp bilim alýar.
Astrahan oblastynyň Funtowo obasynda Magtymguly adyndaky döwrebap mekdep bilim ulgamyndaky netijeli gatnaşyklaryň aýdyň beýany bolup durýar. Onuň türkmen medeniýetiniň merkezine öwrülendigini belläp, I.Babuşkin beýik Pyragynyň döredijilik mirasyny saklamagyň wajypdygyny nygtady.
Hazarýaka döwletleriniň arasynda hoşniýetli goňşuçylyk gatnaşyklaryny berkitmäge gönükdirilen ilkinji on günlük «Hazar – dostluk deňzi» motoýörişi 1-nji aprelde Astahanda başlandy. Oňa gatnaşyjylar Aşgabada gelip, ýoluň ýarsyny — 2,5 müň kilomatrini geçdiler (jemi aralyk 5 müň km). Kerwen eýýäm Atyrau we Aktau, Türkmenbaşy we Aşgabat sebitlerinden geçdi. Geljekde Babolser we Reşte, Astar we Baku, Kaspiýsk sebitlerine barmak meýilleşdirilýär. Motoýöriş 11-nji aprelde Astrahanda tamamlanar.
