Özbegistanyň paýtagtynda ikinji Daşkent halkara maýa goýum forumyna (TIIF-2023) taýýarlyk görülýär. Bu barada Trend Özbegistanyň hökümet portalyna salgylanyp habar berýär.
Çeşmäniň maglumatlaryna görä, forum şu ýylyň 27-28-nji aprelinde Congress Hall Tashkent City-de geçiriler. Forumyň esasy maksady Özbegistanyň we umuman, Merkezi Aziýa ýurtlarynyň maýa goýum potensialyny görkezmek üçin dünýäniň dürli ýurtlaryndan mümkin boldugyndan has köp maýadarlary jemlemekden ybaratdyr.
Çäräniň çäklerinde hünärmenleriň 30-dan gowrak diskussion duşuşyklarynyň, şol sanda panel sessiýalarynyň, tegelek stollaryň we B2B formatyndaky gepleşikleriň geçirilmegine garaşylýar.
Forum üçin hasaba alnyş www.iift.uz salgysy boýunça elýeterlidir we 2023-nji ýylyň 20-nji apreline çenli dowam eder.
Ýatlap geçsek, birinji forum 2020-nji ýylyň mart aýynda geçirildi. Bu giň gerimli çäräniň dowamynda dünýäniň 56 ýurdundan iki müňe golaý gatnaşyjy Özbegistanyň kärhanalarynyň maýa goýum potensialyny ara alyp maslahatlaşmak üçin ýygnandy.
