2023-nji ýylyň mart aýynda Beýik Britaniýada ýaşaýyş jaýynyň ortaça bahasy 257 müň funt sterling boldy, bu geçen ýylyň mart aýy bilen deňeşdirilende 3,1% azdyr. Birleşen Korollygyň Milli gurluşyk jemgyýetiniň (Nationwide Building Society) gözleginde bellenilişi ýaly, bu 2009-njy ýylyň iýul aýyndan bäri iň uly ýyllyk pese gaçyş boldy. Muny rbc.ru ýetirýär.
Beýik Britaniýanyň ýaşaýyş jaý bazary geçen ýyl maliýe bazaryndaky bulaşyklyk sebäpli üýtgedi. Şondan bäri alyjylaryň işjeňligi pes bolmagynda galýar. Ipotekanyň berilmegi hem pese düşdi – 2023-nji ýylyň fewralynda 43,5 müň ýaşaýyş jaý krediti tassyklandy, bu 2022-nji ýylyň degişli döwri bilen deňeşdirilende, takmynan, 40% pesdir.
Nationwide Building Society-nyň baş ykdysatçysy Robert Gardneriň aýtmagyna görä, Beýik Britaniýada ýaşaýyş jaýlarynyň bahalary eýýäm yzygider ýedinji aý bäri peselýär. Gysga möhletde bazarda işjeňligi ýokarlandyrmak kyn bolar, sebäbi sarp edijileriň ynam derejesi pes, öý hojalyklarynyň býujeti bolsa ýokary inflýasiýa sebäpli çäklendirilen diýip, Gardner çaklaýar.
Nationwide Building Society britaniýalylaryň köpüsi üçin ýaşaýyş jaýyna elýeterliligiň bolmazlygy sebäpli gozgalmaýan emläk bazarynda ýagdaýyň kynlaşýandygyny belleýär. Bahalar orta girdejili britaniýalylar üçin örän ýokary bolup galýar, ipoteka goýumlary bolsa geçen ýyl bilen deňeşdirilende iki esseden gowrak ýokarlandy we häzir ýylda 5% töweregi boldy.
