Forbes USA-nyň täzelenen maglumatlaryna görä, amerikaly sazanda we prodýuser Jay-Z-niň baýlygy 2,5 mlrd dollara ýetdi. Ol iň baý rep-ýerine ýetirijileriniň sanawynda birinji orny eýeleýär diýip, forbes.kz belleýär.
Soňky gezek neşir onuň baýlygyny 2021-nji ýylda hasaplapdy: şonda ol 1,1 mlrd dollar az, ýagny 1,4 mlrd dollar diýlip çaklanyldy. Jay-Z-niň aktiwleriniň arasynda Roc Nation güýmenje kompaniýasy, Marcy Venture Partners wençura gaznasy (2019-njy ýylda 85 mln dollar çekdi), giň şekillendiriş sungaty ýygyndysy, şol sanda Žan-Mişel Baskiýanyň işleri bar. Mundan başga-da, sazanda Armand de Brignac şampan brendiniň ýeke-täk eýesidir we D’Usse konýagynyň önümçiligine, Uber taksi hyzmatyna we Tidal aýdym-saz striming hyzmatyna maýa goýdy.
2019-njy ýylda Jay-Z ilkinji hip-hop milliarderi diýlip saýlandy. Forbes USA-nyň öňki redaktory Zak O’Melli “Insider” neşirine beren interwýusynda onuň iň ýakyn bäsdeşiniň baýlygy, takmynan, 1 mlrd dollar bilen bahalandyrylýan repçi Diddy-dygyny belledi.
