Dünýäniň maliýe merkezleriniň reýtinginde Nýu-Ýork London bilen deňleşdi. Bu barada City of London Corporation-yň gözlegine salgylanyp, interfax.ru habar berýär.
Britaniýanyň paýtagty bäsdeşlige ukyplylygy taýdan geçen ýyl bilen deňeşdirilende 1 punkt artdyryp, 60 bal aldy. Şol bir wagtyň özünde Nýu-Ýork birbada iki punkt artdyrdy we 60 bal aldy. Üçünji orunda Singapur (51 bal) ýerleşdi. Bäşligi Frankfurt (46) bilen Pariž (43) jemleýär.
London bu reýtingiň taryhynda ilkinji gezek ýekebara liderligini ýitirdi. Munuň sebäbi Brexit we beýleki sebit maliýe merkezleriniň has işjeň ösmegi boldy diýip, Financial Times belleýär.
City of London Corporation-dan Kris Heýuord maliýe pudagynda we professional hyzmatlar pudagynda ösüşi höweslendirmek üçin uzak möhletleýin meýilnamalaryň gerekdigini belleýär. Häzirki wagtda Siti administrasiýasy Lloyd’s, Schroders, JPMorgan, EY we Barclays kompaniýalarynyň goldaw bermeginde şeýle meýilnamalary düzmäge başlady.
Hasabatda Londonyň innowasiýa, maliýe işjeňligi, maliýe ulgamynyň durnuklylygy we işewürligi alyp barmak üçin infrastruktura, şeýle-de ýokary hünärli işgärleriň we oňyn sazlaşygyň bolmagy taýdan gowy görkezijileri berýändigi bellenilýär. Ýöne Nýu-Ýork tehnologiýa maýa goýumlary we amala aşyrylýan şertnamalaryň mukdary boýunça Britaniýanyň paýtagtyndan öňe geçýär.
Britaniýanyň maliýe pudagy 2022-nji ýylda daşary söwda balansynyň saldosyna 64 mlrd funt möçberinde ($79,2 mlrd) oňyn goşant goşdy, bu dünýäniň islendik ýurduna garanyňda köpdür diýlip, hasabatda bellenilýär.
