Arkadag şäheri üçin döwlet ähmiýetli şäher diýen aýratyn hukuk ýagdaýy bellenildi. Bu barada 2023-nji ýylyň 24-nji martyndan herekete giren «Arkadag şäheri hakynda» Türkmenistanyň Kanunynda bellenilýär. Kanun türkmen metbugatynda çap edildi.
Bu Kanun Arkadag şäheriniň hukuk ýagdaýyny, şonuň ýaly-da Arkadag şäheriniň wezipelerini amala aşyrmagy bilen baglylykda döwlet häkimiýet edaralarynyň işiniň hukuk, guramaçylyk we beýleki esaslaryny kesgitleýär.
Kanun IV bapdan, 13 maddadan ybarat.
Kanuna laýyklykda, Arkadag şäheriniň çägi Türkmenistanyň çäginiň aýrylmaz bölegini düzýär.
Arkadag şäheriniň eýeçiliginde şäher býujetiniň serişdeleri, şäher kärhanalarynyň we edaralarynyň emlägi, şeýle hem kanuna laýyklykda beýleki ýuridik we fiziki şahslaryň eýeçiliginde bolmadyk gaýry obýektler durýar.
Arkadag şäheriniň çäginde ýerine ýetiriji häkimiýet şäheriň häkimi we etraplaryň häkimleri tarapyndan amala aşyrylýar. Arkadag şäheriniň häkimi Türkmenistanyň Prezidenti tarapyndan bellenilýär. Arkadag şäheriniň häkimi Türkmenistanyň Prezidentine hasabat berýär. Arkadag şäheriniň etraplarynyň häkimleri Türkmenistanyň Prezidenti tarapyndan Arkadag şäheriniň häkiminiň teklibi boýunça bellenilýär. Arkadag şäheriniň etraplarynyň häkimleri Arkadag şäheriniň häkimine hasabat berýärler.
Arkadag şäherinde ýerine ýetiriji häkimiýetiň ýerli pudaklaýyn edaralarynyň ýolbaşçylaryny wezipä bellemek we wezipeden boşatmak Türkmenistanyň Ministrler Kabineti we Arkadag şäheriniň häkimi bilen ylalaşylyp, Türkmenistanyň ýerine ýetiriji häkimiýetiniň merkezi pudaklaýyn edarasynyň (ministrlikler, pudaklaýyn edaralar) ýolbaşçysy tarapyndan amala aşyrylýar.
